މިއަހަރުގެ ޙައްޖުގެ އަޅުކަން އަދާކުރުމަށްޓަކައި ދިވެހި ޙައްޖުވެރިންގެ ތެރެއިން ބައެއް ހައްޖުވެރިން ސުޢޫދީ ޢަރަބިއްޔާއަށް އަތުވެއްޖެއެވެ. މިއަދު ސުޢޫދީ ގަޑިން މެންދުރު 2:30 ގެ ހާއިރު ޖެއްސި ފްލައިޓްއިން ޖިއްދާގެ ބައިނަލްއަޤްވާމީ ވައިގެ ބަނދަރަށް ދިވެހި ދެ ޙައްޖު ގްރޫޕެއްގެ 250 އަށްވުރެ ގިނަ ޙައްޖުވެރިން އައިސްފައިވެއެވެ.
މިއަދު ސުޢޫދީ ޢަރަބިއްޔާއަށް އައިސްފައިވަނީ ސިސިލްފަރު ޙައްޖު ޢުމްރާ ގުރޫޕުގެ ޙަވާލުގައި ޙައްޖަށްއައި 150 އެއްހާ ޙައްޖުވެރިންނާއި މަނާސިކް ޙައްޖު ޢުމްރާ ގުރޫޕްގެ ޙަވާލުގައި އައި 86 ޙައްޖުވެރިންނެވެ. މި ދެ ގުރޫޕުގެ އިތުރު ޙައްޖުވެރިން ކުރިއަށް އޮތް ދެތިން ދުވަހެއްގެ ތެރޭގައި ސުޢޫދީޢަރަބިއްޔާއަށް އަންނާނެކަމަށް ދެ ގުރޫޕުން ޚަބަރު ދެއްވައެވެ.
މަނާސިކް ގުރޫޕުން ޚަބަރު ދޭ ގޮތުގައި އެ ގުރޫޕުން ޙައްޖަށް އައި ޙައްޖުވެރިން، ނޮވެމްބަރު 17 ވާ ހޯމަ ދުވަހު މަދީނާއަށް ދާގޮތަށް ވަނީ ހަމަޖެހިފައެވެ.
ޢާއްމުކޮށް ހުރިހާ ޙައްޖުވެރިންގެ ޙާލުވެސް ރަނގަޅުކަމަށާއި، ދަތި ކަމަކަށް ދިމާވީ ކަމަކީ، އެއާޕޯޓުގައި ފުދޭވަރަކަށް ގިނައިރު މަޑުކުރަން ޖެހުން ކަމަށް ސިސިލްފަރުން ވާހަކަދެއްކެވި އިސް ބޭފުޅަކު ވިދާޅުވިއެވެ. އެއާޕޯޓުގައި ގިނައިރު ތިބެން ޖެހުނީ އިމިގްރޭޝަނުން ޙައްޖުވެރިންގެ އިނގިލީގެ ނިޝާން ނެގުންފަދަ ބައެއް ކަންތައް ކުރަންޖެހޭތީކަމަށްވެސް އޭނާ މަޢުލޫމާތު ދެއްވިއެވެ.
| 
