އަޅުގަނޑުމެންގެ ރާއްޖޭގެ ވަރަށް ގިނަ ރައްތަކަށް އުދައަރައި ވަރަށް ގިނަ ލޮބުވެތި އަޚުންނާއި އުޚުތުން ވަނީ ޙާލުގައި ޖެހިފައެވެ. އެންމެހައި ރައްޔިތުން މިފަދަ ކަންކަމާ ކުރިމަތިލާންޖެހޭނީ ވަރަށް އީމާންތެރިކަމާ އެކުގައެވެ. މިއީ އެއްވެސް މީހަކަށް ކޮންޓްރޯލް ކުރެވޭނޭ ކަމެއްނޫނެވެ. ރާޅުތައް މަތަކުރައްވާ ފަރާތަކީ ހަމަ އެކަނީ ﷲ އެވެ.  

މިއީ ޤުދްރަތީ ގޮތުން ކުރިމަތިވާ ކަމެކެވެ. މީސްތަކުން ﷲ މަތިން ހަނދުކުރުން ހުއްޓެވެ. މާތް ﷲ ގެ ޙަޟްރަތަށް ޙަމްދުކޮށް އެކަލާނގެ އަށް ޝުކުރު ކުރުން ހުއްޓެވެ. މާތް ﷲއާ ވަކީލުކުރުން ހުއްޓެވެ. އެކަލާނގެ ރަޙްމަތްވަންތަކަން ބޮޑެވެ. އެކަލާނގެ ކުޅަދުންވަންތަކަން ނުވާނަމަ އަޅުގަނޑުމެންގެ މި ދިވެހިރާއްޖެ ކަނޑުގެ ޝިކާރަޔަކަށްވެ މިތަން ކާއިނާތުން ފުހެވިގެން ހިނގައިދާނެއެވެ. އެކަލާނގެ އަށް ޙަމްދު ހުއްޓެވެ. ކުރިންވެސް ފަހުންވެސް އަބަދުވެސް ޙަމްދު ހުރީ އެކަލާނގެ ޙަޟްރަތަށެވެ.

ލޮބުވެތި އަޚުންނޭވެ! މިފަދަ ކޮންމެކަމެއް ދިމާވާ ހިނދު މާތް ﷲ ގެ މިންވަރު ފުޅާމެދު ރުހެންޖެހޭނެއެވެ. ކީރިތި ރަސޫލާގެ ބަސްފުޅެއްގެ މާނައިގައިވެއެވެ.  '' މުއުމިން އިންސާނާގެ ހުރިހާކަމެއްގައިވެސް ވަނީ ހެޔޮކަމެވެ. އޭނާއަށް އުފާވެރިކަމެއް މެދުވެރިވެއްޖެނަމަ ﷲ އަށް ޝުކުރުކުރެއެވެ. އެކަމުގައިވެސް ވަނީ އޭނާ އަށް ހެޔޮކަމެވެ. އަދި ހިތާމައެއް މެދުވެރިވެއްޖެނަމަ ކެތްތެރިވެ ﷲ އާވަކީލުކުރެއެވެ. އެކަމުގައިވެސް ވަނީ އޭނާ އަށް ހެޔޮކަމެވެ. '' މުއުމިނުންގެ ސިފައަކަށް ވާންވާނީ މިގޮތެވެ. އެކާލަނގެ އަޅުތަކުން އިމްތިޙާންކުރައްވަނީ އެއަޅުތަކުންގެތެރެއިން އީމާންތެރި ކެތްތެރި އަޅުތަކުންނަށް ހެޔޮ ޖަޒާދެއްވުމަށެވެ. 

އަދި ހަމަ އެހެންމެ މިފަދަ ވަގުތެއްގައި އަޅުގަނޑުމެން ހަނދާންކޮށްލުން ހުރި ކަންތައްތަކެއްވެސް ވެއެވެ. އެއީ މިފަދަ ކޮންމެ ކަމަކުން އަޅުގަނޑުމެން ޢިބްރަތް ޙާޞިލް ކުރަން ޖެހޭނެކަމެވެ. އެއީ އަޅުގަނޑުމެންނަކީ މުސްލިމުންނަށްވީތީއެވެ. އަޅުގަނޑުމެންނަކީ ޒަމާނުއްސުރެން ﷲގެ ދީން ޤަބޫލުކޮށް އެކަލާނގެ އަށް އީމާންވެގެންތިބި ބަޔަކީމުއެވެ. އަޅުގަނޑުމެން އުޅެމުން އައީ ވަރަށް އަމާންކަމާއެކުގައެވެ. ވަރަށް ތަނަވަސްކަމާއެކުގައެވެ. ވަރަށް ޞުލްޙަވެރިކަމާއެކުގައެވެ. ވަރަށް އަޚްވަންތަ ކަމާއެކުގައެވެ.

މުސްލިމު އަޚުންނޭވެ! މިއަދު ޤައުމުގެ ޙާލަތު މިވަނީ ވަރަށް ދަށަށް ގޮސްފައެވެ. ބަދުއަޚުލާޤީ ޢަމަލުތައް ދަނީ ގިނަވަމުންނެވެ. ދީނާ ޚިލާފު ކަންކަމާ ޢަމަލުތައް ދަނީ ޢާއްމު ވަމުންނެވެ. މިއީ އެންމެން ވިސްނައި ޒިންމާ ނަގަންޖެހޭނޭ ކަމެކެވެ. މުޖުތަމަޢު މިޙާލަތައް ދިޔައީ ކީއްވެގެންތޯއެވެ؟ ދީނަކީ އެންމެ މަތިވެރި ނިޢުމަތެވެ. އަޅުގަނޑުމެން ﷲ ދެއްވި އެމަތިވެރި ނިޢުމަތްތައް ހަނދާން ނައްތާލީމެވެ. އަދި އަޅުގަނޑުމެންނަށް ލިބުނު ތަނަވަސްކަމާއެކު ﷲ އަށް އުރެދުމުގެތެރޭގައި ޣާފިލުވީމެވެ. އެއަށްފަހުގައި މުޖުތަމަޢު ފަސާދަވެގެން ދިޔައެވެ. އަމަންއަމާންކަން ގެއްލިދިޔައެވެ. އަދި މި ފަހުގެ އަހަރުތަކުގައި ރާއްޖެ ފަސާދަވެފައި މިއޮތީ މުޅިދިވެހި ތާރީޚްގައިވެސް ދިވެހިރާއްޖެ މީގެ ކުރިން ފަސާދަވެފައި ނުވާހާ ބޮޑަކަށެވެ. ޝައްކެއްނެތްގޮތުގައި އެބިމެއްގައި ޙަރާމް ކަންތައް ގިނަވެ ރިބާ ކެއުމާއި ރާބުއިމާ ރާވިއްކުމާ  ޒިނޭކުރުމާއި އެއްޖިންސުގެ ގުޅުން ހިނގުމާއި މަކަރުހެދުމާއި ޚިޔާނާތަތެރިވުމާއި ދޮގުހެދުމާއި އޮޅުވާލުމާއި ޒަކާތް ނުދެއްކުމާއި މީހުންގެ އަބުރާ ބެހުމާއި  މަސްތުވާތަކެތި ބޭނުންކުރުމާއި ދެބައޮޑުވުމާއި މިފަދަ ބޮޑެތި މުންކަރާތްތަކާއި ފާހިޝް ކަންތައް މިދަނީ ޢާއްމުވަމުންނެވެ.

މިހުރިހާކަމެއްގެ އިތުރުން މަސްތުވާތަކެތި ނުނަގާމީހަކު ހުރި އާއިލާއެއް މިއަދު އަޅުގަނޑުމެންގެ މުޖްތަމަޢުގައި މަދުވާނެ ކަން ޔަޤީނެވެ. މާލެއާއި މުޅި ރާއްޖެތެރެއަށް ވަނީ މި ނުރައްކާތެރި ވަބާ ފެތުރިފައެވެ. މިރާއްޖޭގައި ވަނީ އިސްލާމްދީނު ގެ ޙުރްމަތް ކެނޑި ފަސާދަވެފައެވެ. މުންކަރާތްތައް މަނާކުރުންވަނީ ބައެއްގެ ޙައްޤަކަށް އަރައިގަތުމަށެވެ. މިފަދަ ޙާލަތަކަށް މި ރާއްޖެ މިވަނީ ގޮސްފައެވެ. ނިވާކަން ކުޑަގޮތްތަކަށްތިބެ ޖިންސުއްލަތީފުންނެށުމާއި، މަޖާކުރުމާއި، ފެޝަން ޝޯ ބޭއްވުމާ، އިސްލާމުންގެ މުޖުތަމަޢާއި ނުގުޅޭ އެތައްކަމެއް މިރާއްޖޭގައިދަނީ ގިނަވަމުންނެވެ. މިފަދަ ފާފަތަކުގެ  ސަބަބުން ﷲ ވަނީ އިސްވެދިޔަ އެތައް އުއްމަތެއް ހަލާކު ކުރަށްވާފައެވެ. 

މާތް ﷲ އަލްއަންޢާމް ސޫރަތުގެ 44 ވަނަ އާޔަތުގައި ވަޙީ ކުރައްވާފައިވެއެވެ : (( فَلَمَّا نَسُواْ مَا ذُكِّرُواْ بِهِ فَتَحْنَا عَلَيْهِمْ أَبْوَابَ كُلِّ شَيْءٍ حَتَّى إِذَا فَرِحُواْ بِمَا أُوتُواْ أَخَذْنَاهُم بَغْتَةً فَإِذَا هُم مُّبْلِسُونَ )) މާނައީ :''  ދެން އެބައިމީހުންނަށް ހަނދާންކޮށްދެވުނު ކަންތައް އެބައިމީހުން ހަނދުމަނައްތައިފި ހިނދު ހުރިހައިގޮތަކުން ތަނަވަސްވާނޭ ގޮތްތައް މެދުވެރިކޮށް ދެއްވީމެވެ. އެބައިމީހުންނަށް ލިބުނުކަންތައްތަކާއިމެދު އެބައިމީހުން އުފާކޮށްފުމަށް ދާންދެންނެވެ. އެހިނދު ކުއްލިއަކަށް ތިމަން ﷲ އެބައިމީހުން ހަލާކުކުރައްވައި، ނެތިކުރެއްވީމެވެ. ދެން ސަލާމަތްވާނޭކަމުގެ އުންމީދު ދޫކޮށްލައިފައި ތިބިބަޔަކުކަމުގައި އެބައިމީހުންވިއެވެ.  ''

ޝައްކެއްނެތްގޮތުގައި މުޖުތަމަޢު ރަނގަޅު ގޮތުގައި އޮއްވާ ﷲ އެއްވެސް ބަޔަކު ހަލާކު ނުކުރަށްވާނެކަމަށް ވަޢްދުވެވޮޑިގެންފައިވެއެވެ. މާތް ﷲ ވަޙީކުރެއްވިއެވެ. (( وَمَا كَانَ رَبُّكَ لِيُهْلِكَ الْقُرَى بِظُلْمٍ وَأَهْلُهَا مُصْلِحُونَ )) هود: 117  މާނައީ :    '' ރަށްތަކުގެ އަހުލުވެރިން އިޞްލާޙުކުރުމަށް  މަސައްކަތްކޮށްކޮށްތިއްބާ  އަނިޔާވެރިގޮތުގައި ރަށްތައް ހަލާކުކުރަށްވާކަށް  ކަލޭގެފާނުގެ ވެރިރަސްކަލާންގެ އިރާދަ ނުކުރަށްވަތެވެ. ''

ބިންމަތި ފަސާދަވެ ނުބައި ޢަމަލު ގިނަވެއްޖެނަމަ މާތް ﷲ އެބައި މީހުންނަށް ޢުޤޫބާތް މެދުވެރި ކުރަށްވައެވެ. އެއީ އެބައިމީހުން ﷲ ގެ ޙަޟްރަތަށް  ރުޖޫޢަ ވޭތޯއެވެ. މިކަން ބަޔާންކުރައްވަމުން މާތް ﷲ ވަޙީކުރެއްވިއެވެ.  (( ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُم بَعْضَ الَّذِي عَمِلُوا لَعَلَّهُمْ يَرْجِعُونَ)) الروم      41މާނައީ : '' މީސްތަކުންކުރި، ނުބައި ޢަމަލުތަކުގެ ސަބަބުން އެއްގަމާއި ކަނޑުގައި ( ދަތިކަމާއި ، ) ފަސާދަ އުފެދިއްޖެއެވެ. އެއީ އެބައިމީހުން ކުރި ބައެއް ޢަމަލުތަކަށްހުރި ( ޢަޒާބުގެ ) ރަހަ ދެއްކެވުމަށްޓަކައެވެ. އެއީ އެމީހުން ﷲގެ މަގަށް  އަލުން ރުޖޫޢަވާތޯއެވެ. ''

އިސްވެދިޔަ އާޔަތްތަކުގެ އަލީގައި ބަޔާންވެދިޔަ ގޮތުން އުއްމަތްތަށް ހަލާކުވެދަނީއެބައިމީހުން ﷲ އަށް އުރެދުންގިނަކުރުމުންނެވެ. މިވާހަކަ އިތުރަށް ކީރިތި ޤުރްއާނުގައި އައިސްފައިވެއެވެ. މާތް ﷲ ވަޙީކުރަށްވާފައިވެއެވެ. وَلَوْ أَنَّ أَهْلَ الْقُرَى آمَنُواْ وَاتَّقَواْ لَفَتَحْنَا عَلَيْهِم بَرَكَاتٍ مِّنَ السَّمَاء وَالأَرْضِ وَلَكِن كَذَّبُواْ فَأَخَذْنَاهُم بِمَا كَانُواْ يَكْسِبُونَ (96)  أَفَأَمِنَ أَهْلُ الْقُرَى أَن يَأْتِيَهُمْ بَأْسُنَا بَيَاتاً وَهُمْ نَآئِمُونَ (97) أَوَ أَمِنَ أَهْلُ الْقُرَى أَن يَأْتِيَهُمْ بَأْسُنَا ضُحًى وَهُمْ يَلْعَبُونَ (98)  أَفَأَمِنُواْ مَكْرَ اللّهِ فَلاَ يَأْمَنُ مَكْرَ اللّهِ إِلاَّ الْقَوْمُ الْخَاسِرُونَ (99) أَوَلَمْ يَهْدِ لِلَّذِينَ يَرِثُونَ الأَرْضَ مِن بَعْدِ أَهْلِهَا أَن لَّوْ نَشَاء أَصَبْنَاهُم بِذُنُوبِهِمْ وَنَطْبَعُ عَلَى قُلُوبِهِمْ فَهُمْ لاَ يَسْمَعُونَ (100) تِلْكَ الْقُرَى نَقُصُّ عَلَيْكَ مِنْ أَنبَآئِهَا وَلَقَدْ جَاءتْهُمْ رُسُلُهُم بِالْبَيِّنَاتِ فَمَا كَانُواْ لِيُؤْمِنُواْ بِمَا كَذَّبُواْ مِن قَبْلُ كَذَلِكَ يَطْبَعُ اللّهُ عَلَىَ قُلُوبِ الْكَافِرِينَ (101) وَمَا وَجَدْنَا لأَكْثَرِهِم مِّنْ عَهْدٍ وَإِن وَجَدْنَا أَكْثَرَهُمْ لَفَاسِقِينَ (102)  الأعراف 96 ? 102  މާނައީ '' ރަށްތަކުގެ އަހުލުވެރިން އީމާންވެ ތަޤްވާވެރިވެ ބިރުވެތިވިނަމަ ތިމަން ﷲ އެމީހުންގެ މައްޗައް އުޑުންނާއި ބިމުން ބަރަކާތް ދެއްވީމެވެ. ނަމަވެސް އެމީހުން އިންކާރުކޮށް ދޮގުކުރީއެވެ. ދެންފަހެ އެމީހުންކުރި ނުބައިޢަމަލުތަކަށްޓަކައި ތިމަންރަސްކަލާނގެ އެމީހުން  ހަލާކު ކުރެއްވީމެވެ. * ފަހެ ރަށްތަކުގެ އަހުލުވެރިން އެމީހުން ނިދާފައިތިއްބައި ރޭގަނޑުގައި  އެމީހުންގެގާތަށް ތިމަންރަސްކަލާނގެ ކޯފާގެ އަޒާބު ހުށަހެޅިދާނެކަމުގެ އެއްވެސް ބިރެއްނުގަނެ އަމާންވެ ތިބީހެއްޔެވެ ؟ * ނުވަތަ ފަހެ ރަށްތަކުގެ އަހުލުވެރިން އެމީހުން ފަރުވާލެއްނެތި ކުޅެކުޅެތިއްބައި  ދުވާލުގެ އަލީގައި އެމީހުންގެ ގާތަށް ތިމަންﷲ ގެ ކޯފާ އައިސް ހުށަހެޅިދާނެކަމުގެ އެއްވެސް ބިރެއްނުގަނެ އަމާންވެ ތިބީހެއްޔެވެ ؟ * ފަހެ ﷲ އެފަދަ ފާފަވެރިން ނިމިދިއުމަށް ތަދުބީރު ކުރައްވާ ކުރެއްވުމަށް އެމީހުން އެއްވެސް ބިރެއްނެތި އަމާންވެ ތިބީހެއްޔެވެ ؟ ފަހެ މާތް ﷲގެ ތަދުބީރުފުޅަށް ބިރެއްނެތި ތިބޭހުށީ ގެއްލެނިވެފައިވާ މީހުންނެވެ. * ބިމުގެއަހުލުވެރިން ނެތުމަށްފަހު ދެން އެތަންލިބޭބަޔަކަށް ފަހެ ތިމަން ﷲ އިރާދަކުރަށްވައިފިނަމަ ( އެމީހުންކުރާ ފާފަތަކުގެ ސަބަބުން ) ތިމަން ﷲ ކޯފާލައްވާއި އެމީހުން ހަލާކު ކުރަށްވާފާނޭކަމާއި ، އަދި އެމީހުންގެ ހިތްތައް ބަންދުކުރައްވައި ، އެއަށްފަހު އެމީހުންނީ ( ޢިބްރަތުގެ އަޑު ) ނުއިވޭ ބައެއްކަމުގައި ލައްވާފާނެކަން އެނގިފާޅު ނުވަނީހެއްޔެވެ ؟ * އެރަށްތަކުގެ މީހުންގެ ޚަބަރު ތިމަން ﷲ ކަލޭގެފާނަށް ކިޔައިދެއްވައި ވަޙީކުރައްވަމެވެ. އެމީހުންގެ ގާތައް ފައުޅުވެގެންވާ ހެކިތަކާއިގެން ރަސޫލުން ވަޑައިގަތެވެ. ދެންފަހެ އެމީހުން ކުރިން ދޮގުކުރި އެއްޗަކަށް އެމީހުން ހަމަކަށަވަރުން އީމާނެއްނުވިއެވެ.  ކާފިރުވާ މީހުންގެ ހިތްތައް މާތް ﷲ ބަންދު ކުރައްވަނީ އެފަދައިންނެވެ. * އެމީހުންގެ ގިނަމީހުންގައި ޢަހުދު ( ވިކަންތައްތަކަށް ވަފާތެރި) ވުން ފެންނާކަށް ނެތެވެ . އަދި ކީންހެއްޔެވެ. އެމީހުންގެ ގިނަމީހުން ފެންނަހުށީ ފާސިޤުން ( ﷲ އަށް އުރެދިފައިވާމީހުން ) ކަމުގައެވެ.''

އަދިވެސް ﷲ ވަޙީކުރައްވާފައިވެއެވެ. (( وَضَرَبَ اللّهُ مَثَلاً قَرْيَةً كَانَتْ آمِنَةً مُّطْمَئِنَّةً يَأْتِيهَا رِزْقُهَا رَغَدًا مِّن كُلِّ مَكَانٍ فَكَفَرَتْ بِأَنْعُمِ اللّهِ فَأَذَاقَهَا اللّهُ لِبَاسَ الْجُوعِ وَالْخَوْفِ بِمَا كَانُواْ يَصْنَعُونَ)) النحل: 112މާނައީ: '' ރަށެއްގެ ވާހަކައިން މާތް ﷲ މިސާލެއް ޖެއްސެވިއެވެ. އަމާންކަން ލިބި ހަމަޖެހިގެންވާކަމުގައި ރަށެކެވެ ހުރިހައިތަނަކުން ތަނަވަސްކަމާއެކު އެރަށުގެމީހުންގެ ރިޒުޤު އެރަށަށް އައުދެއެވެ.  ދެން އެރަށް ( އެރަށުގެ މީހުން ) މާތް ﷲގެ ނިޢްމަތައް ކާފިރުވިއެވެ. ދެން އެބައިމީހުން ކަންތައް ކުރަމުން ދިޔަ ގޮތުގެ ސަބަބުން ބަނޑުހައިހޫނުކަމާއި ބިރުވެރިކަމުގެ ފޭރާން އެބައިމީހުންގައި ލައްވައި އެކަންކަމުގެ ރަހަ އެބައި މީހުންނަށް މާތް ﷲ ދެއްކެވިއެވެ. ''

އަޅުގަނޑުމެން މިކަންކަމުން ޢިބްރަތް ޙާޞިލްކުރަންވީއެވެ. އިސްވެދިޔަ އުއްމަތްތަކުގެ ވާހަކަ ކީރިތި ޤުރްއާނުގައި އައިސްފައިމިވަނީ މިސަބާބާހުރެއެވެ. އެއިން ޢިބްރަތް ޙާސިލް ކުރުމަށެވެ. އަޅުގަނޑުމެންނަށްވުރެން މާބޮޑެތި މާތަނަވަސްކަމާއެކު ބިންމަތީގައި އުޅުނު މީހުންވެސް ﷲ ވަނީ ހަލާކު ކުރައްވާފައެވެ. ﷲ އީ ހުރިހާކަމަކަށް ވެސް ކުޅަދުންވަންތަ ރަސްކަލާންގެ އެވެ. އެކަލާނގެ އަށް ބިރުވެތިވާންވީއެވެ. އެއިރުން ހުރިހާ ނުރައްކާތެރި ވަބާތަކާއި ބިރުވެރިކަމުން އެކަލާނގެ އަޅުގަނޑުމެން ސަލާމަތްކުރައްވާނެތެވެ. މިފުރްޞަތުގައި އެންމެހައި އަޚުންނާއި އުޚުތުންނަށް ތަޢުޒިޔާ ފޮނުވަމެވެ. ޙާލުގައި ޖެހުނު ޢާއިލާތަކަށް ކެތްތެރިކަން ދެއްވުމަށް ﷲ އަށް ދުޢާކުރަމެވެ. އެކަލާނގެއީ އެންމެ އޯގާތެރިވެ ވޮޑިގެންވާ އިލާހެވެ.